រកមិនទាន់ឃើញឃាតករសម្លាប់កាត់ក្បាលបុរសម្នាក់នៅស្រុកកំពង់ត្រាចនៅឡើយទេ
ខេត្តកំពត ៖ ឃាតករសម្លាប់បុរសម្នាក់ឈ្មោះយង់ ហាន អាយុ៤៨ឆ្នាំ ដោយកាត់ក្បាលក្នុងស្រែ កាលពីព្រលប់ថ្ងៃទី២១ វិច្ឆិកា ២០១៣ នៅភូមិកោះចំការ ឃុំបឹងសាលាខាងត្បូង ស្រុកកំពង់ត្រាច រហូតមកដល់ថ្ងៃទី២៤ វិច្ឆិកា នេះនៅមិនទាន់រកឃើញនៅឡើយ ចំណែកក្បាលសពជនរងគ្រោះក៏នៅ មិនទាន់រកឃើញដែរ។
គួររំលឹកផងដែរថា បុរសម្នាក់ត្រូវជនដៃដល់កាត់ ដាច់ក្បាលយកទៅបាត់ ខណៈទៅដាក់សន្ទូចពេលយប់ បង្កឱ្យមានការភ្ញាក់ផ្អើល កាលពីវេលាម៉ោងជាង១២រំលងអធ្រាត្រ ឈានចូលថ្ងៃទី២២ វិច្ឆិកា ២០១៣ នៅក្នុងវាលស្រូវ ស្ថិតក្នុងភូមិកោះចម្ការ ឃុំ បឹងសាលាខាងកើត ស្រុកកំពង់ត្រាច ។
អំពើឃាតកម្មដ៍សាហាវនេះ គេមិនទាន់ដឹងពីមូលហេតុនៅឡើយ តែសមត្ថកិច្ចសន្និដ្ឋានជំហានដំបូងថា សង្ស័យរឿងគំនុំ ។ បុរសរងគ្រោះត្រូវបានគេស្គាល់ឈ្មោះ យុង ហាន អាយុ៥០ឆ្នាំ មានប្រពន្ឋនិងកូន៦នាក់នៅក្នុងបន្ទុក ។
បើតាមសេចក្តីរាយការណ៍ពីអ្នកឆ្លើយឆ្លង ព័ត៌មានកោះសន្តិភាពបានឱ្យដឹងថា មុនពេលកើតហេតុ បុរសរងគ្រោះបានទៅរាយសន្ទូចដូចសព្វមួយដង ដែលមានចម្ងាយពីផ្ទះប្រហែល៥០០ម៉ែត្រ ។
ប្រភពបន្តថា លុះដល់ម៉ោងជាង១២អធ្រាត្រ ដោយបាត់មិនឃើញត្រឡប់មកវិញ ក្រុមគ្រួសារបានដើររក ស្រាប់តែប្រទះឃើញជនរងគ្រោះដេកស្លាប់នៅក្នុងវាលស្រូវ ដោយបាត់ក្បាលរកមិនឃើញ និងបង្កឱ្យមានការផ្អើលឆោឡោតែម្តង ៕
0 comments:
Post a Comment