កំពូលខ្សែប្រយុទ្ធរបស់ជម្រើសជាតិថៃ Teerasil Dangda នឹងទៅចូលរួមក្លិប Atletico Madrid នៅលីកកំពូលអេស្ប៉ាញជាលើកទី២ក្នុងពេលឆាប់ៗនេះ ជាមួយក្ដីរំពឹងថានឹងចុះកិច្ចសន្យាជាមួយក្លិបនេះជាអចិន្ត្រៃយ៍ក្នុងខែមករាឆ្នាំ២០១៤។
អត្ថបទ៖ អស់ស្ទះ! ទាត់ចូល ស្រាតខោដាក់លើក្បាល ត្រូវបណ្ដេញចេញ (វីដេអូ)
កាលពីខែមករាដើមឆ្នាំនេះ ខ្សែប្រយុទ្ធរបស់ក្លិប Muangthong United វ័យ២៥ឆ្នាំរូបនេះ ធ្លាប់ទៅធ្វើតេស្តសាកល្បងរយៈពេល២សប្ដាហ៍នៅ At. Madrid ម្ដងហើយ ពីព្រោះក្លិបយក្សរបស់ថៃនិងក្លិបយក្សរបស់អេស្ប៉ាញពីរនេះគឺជាដៃគូសហការជិតស្និទ្ធនឹងគ្នា។
បន្ទាប់ពីក្របខ័ណ្ឌ Thai Premier League បញ្ចប់រដូវកាលម្សិលមិញដែលក្លិប Buriram United ជាអ្នកលើកពាននោះ លោក Pongsak Pholanan ប្រធានក្លិប Muangthong United បង្ហើបដំណឹងថា Teerasil នឹងទៅធ្វើតេស្តនៅ Estadio Vicente Calderón ម្ដងទៀត មុននឹងអាចចុះកិច្ចសន្យាជាផ្លូវការក្នុងឱកាសទីផ្សារដោះដូរកីឡាករនៅអឺរ៉ុបបើកជាលើកទី២នៅខែមករាឆ្នាំ២០១៤។
អត្ថបទ៖ ក្លិបថៃទាក់ទង Del Piero
ប្រធានក្លិបជើងឯកលីកកំពូលថៃ៣សម័យបញ្ជាក់ច្បាស់ថា៖ “ជាដំបូង គេ(Teerasil) ត្រូវហ្វឹកហាត់ជាមួយ Atletico សិន ហើយមិនទាន់លេងឱ្យក្លិបនេះបាននៅឡើយទេ ដោយសារកូតាកីឡាករបរទេសនៅក្លិបនេះពេញអស់ទៅហើយ។ ម្យ៉ាងវិញទៀត គេត្រូវការពេលដើម្បីសម្របខ្លួនជាមួយបាល់ទាត់អេស្ប៉ាញផងដែរ។ កិច្ចសន្យាខ្ចីជើងរយៈពេលខ្លីមួយអាចនឹងកើតមានឡើង ហើយប្រសិនបើអ្វីៗដំណើរការរលូនតាមការព្រាងទុក ក្លិប Atletico នឹងបញ្ចូលឈ្មោះ Teerasil ក្នុងបញ្ជីកីឡាករដែលត្រូវលេងក្នុងក្របខ័ណ្ឌ La Liga”។
អត្ថបទ៖ កំពូលខ្សែបម្រើទាំង៥ប្រចាំ Suzuki Cup
ក្រៅពីមូលហេតុ Muangthong និង Atletico ជាក្លិបដៃគូ Teerasil ទាក់ទាញចំណាប់អារម្មណ៍ពីក្លិប Atletico ក៏ដូចជា Getafe ដោយសារតែទម្រង់លេងរបស់គេនៅក្នុងព្រឹត្តិការណ៍ AFF Suzuki Cup ឆ្នាំ២០១២។
នៅចាំបានថានៅចុងឆ្នាំ២០០៧ Teerasil គឺជាកីឡាករថៃម្នាក់ក្នុងចំណោមកីឡាករល្អៗពីរបីនាក់ដែលលោកអតីត នាយករដ្ឋមន្ត្រីថៃ Thaksin Shinawatra ទិញទៅចូលរួម Manchester City ប៉ុន្តែមិនដែលបានលេងឱ្យក្លិបនៃលីកកំពូលអង់គ្លេសមួយនេះឡើយ ដោយសារតែក្រសួងមហាផ្ទៃរបស់អង់គ្លេសមិនផ្ដល់អាជ្ញាប័ណ្ណការងារ (work permits) ដល់កីឡាកររូបនេះ។ ដូច្នេះ រូបគេក៏ត្រូវលោក Sven-Göran Eriksson ដែលជាអ្នកចាត់ការជំនាន់នោះ បញ្ចេញឱ្យក្លិប Grasshoppers របស់ស្វីសខ្ចីជើង៕
0 comments:
Post a Comment