ក្រុមកីឡាជម្រើសជាតិកម្ពុជាចំនួន ៣ ប្រភេទនឹងចេញទៅហ្វឹកហាត់នៅប្រទេសមីយ៉ាន់ម៉ា ព្រឹកថ្ងៃទី ១ តុលា ព្រឹកស្អែកនេះ ដើម្បីត្រៀមខ្លួនប្រកួតប្រជែងក្នុងព្រឹត្តិការណ៍កីឡាស៊ីហ្គេមឆ្នាំ ២០១៣ ខាងមុខ ដែលរៀបចំឡើងនៅប្រទេសជិតខាងមួយនេះតែម្ដង។ កីឡាទាំង ៣ ប្រភេទរួមមាន ទូកប្រពៃណី ស៊ីប៉ាតាក្រ និង សី ឈិនឡុង(Chin Lone)។
លោក ស្រ៊ុន លាង គ្រូបង្វឹកក្រុមជម្រើសជាតិទូកប្រពៃណីបានប្ដេជ្ញាថានឹងខិតខំហ្វឹកហាត់ឱ្យអស់ពីលទ្ធភាពដើម្បីនាំកិត្តិយសជូនជាតិមាតុភូមិក្នុងពេលប្រកួតខាងមុខ។ គ្រូបង្វឹកខាងរូបនេះក៏បានលើកឡើងពីភាពខុសគ្នា នៃការហ្វឹកហាត់ក្នុងប្រទេស និង ក្រៅប្រទេសថា នៅក្នុងប្រទេសនៅខ្វះសម្ភារៈនៃការហ្វឹកហាត់ ដូចជាទូកតែម្ដង។ លោកថាសព្ទថ្ងៃនេះទូកពេលហ្វឹកហាត់ក្នុងស្រុកប្រើទូកឈើ តែពេលហ្វឹកហាត់ និង ប្រកួតនៅក្រៅប្រទេសគឺប្រើទូកស្មាច់ ដូច្នេះស្ដង់ដាទូកក្នុងស្រុកខុសគេដាច់តែម្ដង។ ម៉្យាងទៀតធាតុអាកាសនៅពេលប្រកួតក៏សំខាន់ដែរ សម្រាប់សុខភាពកីឡាករ ហើយថាការទៅហ្វឹកហាត់នេះ ហាក់ដូចជាបន្សាំនឹងអាកាសធាតុត្រៀមស៊ីហ្គេមចូលមកដល់។
តាមការគ្រោងទុក ទូកប្រពៃណី នឹងប្រកួតចំណុះ១២នាក់ ៣ វិញ្ញាសា រួមមាន ចម្ងាយ ១ ០០០ ម៉ែត្រ, ៥០០ ម៉ែត្រ និងចំណុះ៥នាក់លើវិញ្ញាសា ៥០០ ម៉ែត្រ។
ក្រុមកីឡាករ កីឡាការិនី ថតរូបជុំគ្នាព្រឹកមិញនៅ NOCC
អត្ថបទពាក់ព័ន្ធ៖ ការហ្វឹកហាត់របស់ក្រុមទូកប្រពៃណីមិនមានបញ្ហាទេទោះកម្ពស់ទឹកទន្លេត្រូវបានព្រមាន
ចំណែកឯលោក ឈួន ឡេង អគ្គលេខាធិការសហព័ន្ធសីប៉ាតាក្រកម្ពុជា ដែលគ្រប់គ្រងទាំងសីប៉ាតាក្រ និង សី ឈិនឡុង (Chin Lone) បានប្រាប់ថា នេះអាចថាជាសំណាងមួយដែលកីឡាទាំង ២ ប្រភេទក្រោមឱវាទរបស់លោក បានចេញទៅហ្វឹកហាត់ត្រៀមនៅប្រទេសមួយដែលមាន ការរីកលូតលាស់ ទាំងកីឡាស៊ីប៉ាត់តាក្រ និង ជាម្ចាស់កំណើតកីឡាសីឈិនឡុង។ ថ្នាក់ដឹកនាំរូបនេះសង្ឃឹមថាក្រុមកីឡាករ កីឡាការិនី នឹងនាំមេដាយ ជូនជាតិ តែលោកមិនហ៊ានកំណត់ថា មេដាយមាស ប្រាក់ ឬ សំរឹទ្ធ នោះទេ។
អត្ថបទពាក់ព័ន្ធ៖ ក្រុមសីប៉ាតាក្រ មកដល់ខ្មែរវិញហើយ ថែមទាំងនាំមេដាយ ២ គ្រឿងមកជាមួយ
ការទៅហ្វឹកហាត់នៅមីយ៉ាន់ម៉ានេះ ទូកប្រពៃណីនឹងបញ្ជូនកីឡាករទៅហ្វឹកហាត់ចំនួន ១៤ នាក់ និង គ្រូបង្វឹក ៣ នាក់។ ចំណែក សីប៉ាតាក្រ និង សី ឈិនឡុង នឹងបញ្ជូនកីឡាករចំនួន ១៦ រូបដែលក្នុងនោះ ប្រុស ៨ នាក់ ស្រី ៨ និង គ្រូបង្វឹក ៣ រូប៕
0 comments:
Post a Comment