កាណូតដឹកអំណោយជូនប្រជាពលរដ្ឋរងគ្រោះដោយទឹកជំនន់ ត្រូវខ្សែទឹកកួចបោកធ្លាក់ លិចម៉ាស៊ីនកាណូតអស់១គ្រឿង (មានវីដេអូឃ្លីប)
ខេត្តកំពង់ធំ ៖ មានហេតុការណ៍មួយ បានកើតឡើងនៅក្រោមស្ពានកំពង់ធំ កាលពីវេលាម៉ោង៤ និង៣០នាទីទៀបភ្លឺថ្ងៃទី១៦ តុលា ២០១៣ ដោយសារកាណូត២គ្រឿង ដែលចងជាប់គ្នា បំរុងនឹងដឹកអំណោយ ចេញដំណើរទៅចែកជូនប្រជាពលរដ្ឋ ពេលនោះស្រាប់តែកម្លាំងទឹក ហូរកួចទៅបុកនឹងស្ពាន បណ្តាលឱ្យបែកក្បាលទូក និងធ្លាក់ម៉ាស៊ីនកាណូត១គ្រឿង ចូលទៅក្នុងទឹកស្ទឹងសែនបាត់ ។
ពាក់ព័ន្ធនឹងករណីដែលគួរឱ្យភ្ញាក់ផ្អើលខាងលើនេះ ត្រូវបានព្រះសង្ឃ១អង្គ ដែលស្ថិតក្នុងស្ថានភាពនោះ បានមានសង្ឃដិកាថា នៅលើកាណូតទាំង២ខាងលើ មានព្រះសង្ឃចំនួន៦អង្គ ដែលនិមន្តមកពីរាជធានីភ្នំពេញ ដើម្បីយកអំណោយ ទៅចែកជូនប្រជាពលរដ្ឋ ដែលរងគ្រោះដោយទឹកជំនន់ ។
ខណៈពេលដែលរៀបនឹងចេញដំណើរ កាណូត១គ្រឿងបានបញ្ឆេះម៉ាស៊ីនរួចហើយ ចំណែកកាណូត១គ្រឿងទៀត បញ្ឆេះម៉ាស៊ីនមិនទាន់ឆេះ ភ្លាមនោះមានខ្សែទឹក ដែលកំពុងតែហូរខ្លាំងផង បានហូរកួចកាណូតទាំង២គ្រឿង ទៅបោកជាមួយនឹងថ្មស្ពានតែម្តង ។ ក្នុងហេតុការណ៍នោះមិនបណ្តាលឱ្យនរណាម្នាក់រងគ្រោះ ឬបាត់បង់ជិវិតឡើយ ៕
0 comments:
Post a Comment