មនុស្ស៤០នាក់បានស្លាប់និង របួសធ្ងន់ស្រាលក្នុងគ្រោះថ្នាក់ចរាចរ១ខែនៅខេត្តកំពង់ឆ្នាំង
កំពង់ឆ្នាំង ៖ មនុស្ស៦នាក់បានស្លាប់ និង៣៤នាក់ផ្សេងទៀតបានរបួសធ្ងន់និងស្រាលនៅក្នុងករណីគ្រោះថ្នាក់ចរាចរចំនួន១៩លើករយៈពេល១ខែចាប់ពីថ្ងៃទី១៦ ខែកញ្ញាដល់ថ្ងៃទី១៤ ខែតុលា ឆ្នាំ២០១៣ នៅក្នុងខេត្តកំពង់ឆ្នាំង។
យោងតាមរបាយការណ៍របស់ការិយាល័យចរាចរណ៍ផ្លូវគោកខេត្ត នៅក្នុងរយៈពេល១ខែកន្លងមកនេះក្នុងខេត្តកំពង់ឆ្នាំង គ្រោះថ្នាក់ចរាចរបានកើតឡើងចំនួន១៩លើកគឺកើនឡើងលើសខែមុនចំនួន១០លើក បណ្តាលឲ្យមនុស្សស្លាប់៦នាក់ស្រី២នាក់ របួសធ្ងន់១៧នាក់ ស្រី៤នាក់ របួសស្រាល១៧នាក់ស្រី៥នាក់។ បង្កឲ្យខូចខាតរថយន្តចំនួន៧គ្រឿងធ្ងន់២គ្រឿង ខូចខាតម៉ូតូ២២គ្រឿងធ្ងន់៨គ្រឿង ខូចកង់២គ្រឿងធ្ងន់១គ្រឿង។
នៅក្នុងករណីគ្រោះថ្នាក់ខាងលើសមត្ថកិច្ចបានស្រាវជ្រាវឃើញមូលហេតុនៃគ្រោះថ្នាក់គឺបើកបរហួសល្បឿនកំណត់១០លើក មិនគោរពសិទ្ធអាទិភាព២លើក បើកជែងក្នុងស្ថានភាពគ្រោះថ្នាក់២លើក បើកបរក្នុងស្ថានភាពស្រវឹង២លើក បើកប្ដូរគន្លងមិនប្រយ័ត្នចំនួន១លើកកត្តាយានយន្ត(ខូចម៉ាស៊ីន)១លើក កត្តាផ្លូវជង្ហុក១លើក។ ក្នុងនោះដែររកឃើញអ្នកជិះម៉ូតូមានគ្រោះថ្នាក់មិនពាក់មួកសុវត្ថិភាពចំនួន១៧គ្រឿង អ្នកពាក់មួកសុវត្ថិភាពមាន៥គ្រឿង។
គ្រោះថ្នាក់ខាងលើនេះបានកើតឡើងលើផ្លូវជាតិលេខ៥ចំនួន៩លើក លើផ្លូវជាតិលេខ៥៣ចំនួន១លើក លើផ្លូវក្រាលកៅស៊ូចំនួន៣លើក និងផ្លូវក្រាលគ្រួសក្រហមចំនួន៦លើក។ គ្រោះថ្នាក់ទាំងនោះបានកើតឡើងនៅក្នុងស្រុកសាមគ្គីមានជ័យចំនួន៣លើក ស្រុកកំពង់ត្រឡាចចំនួន១លើក ស្រុករលាប្អៀរចំនួន៤លើក ក្រុងកំពង់ឆ្នាំង១លើក និងស្រុកជលគីរី១លើក, បានកើតឡើងរវាងរថយន្តបុករថយន្ត២លើក រថយន្តនិងម៉ូតូ៤លើក រថយន្តនិងអ្នកថ្មើរជើង១លើក ម៉ូតូនិងម៉ូតូ៦លើក ម៉ូតូនិងកង់២លើក ម៉ូតូនិងអ្នកថ្មើរជើង១លើក និងម៉ូតូគ្រោះថ្នាក់ដោយខ្លួនឯង៣លើក។
បើប្រៀបធៀបនឹងខែមុនគ្រោះថ្នាក់ខាងលើកើនឡើងចំនួន១០លើក របួសធ្ងន់កើនឡើង៣នាក់ របួសស្រាលកើនឡើង៩នាក់ និងអ្នកស្លាប់មានចំនួនស្មើគ្នា។
លោកអៀរ ប៊ុនធឿន នាយការិយាល័យចរាចរផ្លូវគោកនៃស្នងការដ្ឋាននគរបាលខេត្តសូមអំពាវនាវដល់អ្នកប្រើប្រាស់ផ្លូវទាំងអស់ ចូលរួមគោរពច្បាប់ចរាចរណ៍ឲ្យបានម៉ឺងម៉ាត់ទាំងអស់គ្នា និងត្រូវចេះយោគយល់អធ្យាស្រ័យឲ្យគ្នាក្នុងពេលបើកបរ ទើបអាចកាត់បន្ថយបាននូវគ្រោះថ្នាក់ចរាចរនិងអាយុជីវិតយើងទាំងអស់គ្នា៕
ថារិទ្ធ
0 comments:
Post a Comment