គ្រោះមហន្តរាយ នៃការបាក់ធ្លាយទំនប់អាងកំពីងពួយ ទឹកហូរបុកផ្តាច់ផ្ទះរាប់សិបខ្នង
ខេត្តបាត់ដំបង ៖ បើទោះបីជាក្រុមមន្ត្រី បានព្យាយាមគ្រប់គ្រង ស្ថានភាពទឹកជំនន់ នៅអាងកំពីងពួយបែបណាក៏ដោយ ក៏គ្រោះមហន្តរាយ បានកើតឡើង ទៅតាមបែបបទធម្មជាតិ ហើយនៅព្រឹកថ្ងៃទី៩ ខែតុលានេះ ទំនប់អាងកំពីងពួយ ដែលមានចម្ងាយយ៉ាងវែង នៅជាប់សំណង់ទី២ បានបាក់ធ្លាយ ចាប់ពីសំណង់ទី២ រហូតដល់ជើងភ្នំ ស្ថិតនៅភូមិអន្លង់ស្វាយ ឃុំតាគ្រាម ស្រុកបាណន់ ខេត្តបាត់ដំបង។
បន្ទាប់ពីបាក់ទំនប់ គេសង្កេតឃើញកម្លាំងទឹក នៅចំណុចបាក់ធ្លាយនោះ បានហូរបុកផ្តាច់ ផ្ទះប្រជាពលរដ្ឋ ដែលនៅក្បែរនោះ បង្កឲ្យមានគ្រោះមហន្តរាយធ្ងន់ធ្ងរ មិនខុសពីខ្សែភាពយន្តប៉ុន្មានទេ។ កម្លាំងទឹកដែលហូរចេញ ពីអាងកំពីងពួយ ត្រង់ចំណុចបាក់ធ្លាយនោះ មានសន្ទុះខ្លាំងណាស់ មិនមាននរណាហ៊ានចូល ទៅជិតទេ។ ចំណែកផ្ទះដែលទឹកហូរ នាំយកទៅបាត់នោះ ក៏នៅពុំទាន់ដឹងពីតួលេខច្បាស់លាស់នៅឡើយដែរ ប៉ុន្តែគេគ្រាន់តែដឹងថា ផ្ទះដែលនៅចំមុខទឹក គឺបាក់រលំទាំងអស់ដែលមានចំនួនច្រើនខ្នង។
យ៉ាងណាក៏ដោយ មនុស្ស និងសត្វពាហនៈ មិនបានរងគ្រោះនោះទេ ព្រោះត្រូវបានជម្លៀស ចេញទៅទួលសុវត្ថិភាព បានទាន់ពេលវេលា ។ សូមរំលឹកថា មុនពេលដែលមានការ បាក់ធ្លាយទំនប់នេះ កម្លាំងសមត្ថកិច្ច និងអាជ្ញាធរខេត្ត បានចុះទៅជួយសង្គ្រោះ ប្រជាពលរដ្ឋ ដឹកជញ្ជូនចេញពីលំនៅដ្ឋាន ដើម្បីទៅរកទីទួលសុវត្ថិភាព ខ្លះមានមធ្យោបាយដូចជា គោយន្តកន្ត្រៃ ឬឡានតូច-ធំ បានរើឥវ៉ាន់ ដោយខ្លួនឯង ទើបអាចចៀសផុត ពីគ្រោះថ្នាក់។
ចំណែកនៅក្បែរសំណង់ទី១ ស្ថិតនៅភូមិតាង៉ែន ដែលអាជ្ញាធរ បានយកគ្រឿងចក្រ ទៅកាយបើកមុខទឹកនោះ បានធ្វើឲ្យទំនប់បាក់កាន់តែធំឡើងៗ ដោយសារកម្លាំងទឹកហូរច្រោះ។ កាលពីរសៀលថ្ងៃទី៨ ខែតុលា ឆ្នាំ២០១៣ ក្រុមការងាររបស់ក្រសួង និងមន្ទីរធនធានទឹក សហការជាមួយ អាជ្ញាធរខេត្ដបាត់ដំបង បានចុះអន្ដរាគមន៍ ជួយដល់ប្រជាពលរដ្ឋរងគ្រោះដោយសារទឹកជំនន់ ហើយបានសម្រេច កាយប្រឡាយ ដែលមានប្រវែង ៣០ ម៉ែត្រ ជម្រៅ២,៥ ម៉ែត្រ ដើម្បីរំដោះទឹកពីអាង កំពីងពួយ ជៀសវាងទំហំទឹកធំអាចហូរ បាក់ទំនប់ដោយប្រការណាមួយ ៕
ប្រភពពី៖ www.watphnom-news.com
0 comments:
Post a Comment