ទូរសព្ទទំនើបច្រើនម៉ូដច្រើនម៉ាក បានចេញបង្អួតរាងលើទីផ្សារស្ទើររាប់ភ្លេចក្នុងមួយឆ្នាំៗ។ ដោយឡែក អ្នកដែលទើបទិញទូរសព្ទថ្មីៗ ជានិច្ចកាលតែងតែទៅរកហាងឬកន្លែងអ៊ុតទូរសព្ទនានាដែលល្បីថាអ៊ុតស្អាត ដើម្បីធានាការប្រើប្រាស់យូរអង្វែង។
ប្រិយមិត្តដឹងទេថា តើកន្លែងណាដែលល្បីថាអ៊ុតទូរសព្ទបានស្អាត និងមិនធ្វើឲ្យអតិថិជនទាស់ចិត្ត។ អីចឹង សូមស្ដាប់មិត្តយុវវ័យខាងក្រោមនេះ។
ទើបដើរចេញពីហាងលក់តែគុជមួយកន្លែងនៅម្តុំផ្លូវប៊ូឌិញ កញ្ញា ថាច់ រដ្ឋកញ្ចនាម៉ារី និស្សិតនៃសាកលវិទ្យាល័យ LimkokWing ដែលជាម្ចាស់ iPhone ពីរគ្រឿងថា កញ្ញាចូលចិត្តយកទូរសព្ទទៅអ៊ុតនៅលើផ្សារសុរិយា ព្រោះទីនោះល្បីថាអ៊ុតបានស្អាត។
“អ្នកអ៊ុតនៅផ្សារសុរិយា ល្បីថាអ៊ុតបានស្អាត អ៊ុតហើយមិនធ្វើឲ្យអតិថិជនទាស់ចិត្តនោះទេ បើទោះបីតម្លៃថ្លៃបន្តិចក៏ដោយ”។
ចំណែកកញ្ញា ស្រី ពៅ និស្សិតពេទ្យខាងឆ្មបបានឲ្យដឹងដែរថា អ៊ុតទូរសព្ទជាវិធីមួយដ៏ប្រសើរក្នុងការថែរក្សាទូរសព្ទឲ្យប្រើប្រាស់បានយូរអង្វែង ដូចជាការពារការរបកឫការឆាប់ចាស់ ជាពិសេសពេលចង់លក់ចេញគឺលក់បានថ្លៃ។
កញ្ញាដដែលបានបន្តថា៖ “ពិតណាស់ពេលដែលខ្ញុំទិញទូរសព្ទថ្មី ខ្ញុំតែងតែអ៊ុតភ្លាមនៅហាងលក់ផ្ទាល់តែម្ដង ព្រោះគេអ៊ុតអត់គិតថ្លៃសម្រាប់អតិថិជនដែលទិញផលិតផលរបស់គេ”។
កញ្ញាបានបន្ថែមថា៖ “ខ្ញុំតែងតែយកអ៊ុតសាជាថ្មីពេលមើលថាទូរសព្ទកាន់តែចាស់ ដោយយកទៅអ៊ុតនៅផ្សារសុវណ្ណាជាន់ក្រោម ព្រោះនៅជិតផ្ទះនិងណាមួយតម្លៃសមរម្យផង”។
ជុំវិញបញ្ហានេះដែរ លោក គី បូណា និស្សិតបញ្ញាសាស្ត្រ បានបញ្ចេញមតិយល់ឃើញដែរថា កន្លែងណាក៏ដូចកន្លែងណា សំខាន់អ៊ុតបានស្អាត និងលឿននេះជាតម្រូវការចាំបាច់របស់អតិថិជនគ្រប់រូប។ យ៉ាងណា លោកបានណែនាំកន្លែងមួយចំនួនដែលលោកធ្លាប់អ៊ុតហើយដែលលោកគិតថា គេអ៊ុតបានស្អាតមានដូចជានៅជិតវត្តទូលទំពូង ផ្សារឃ្លាំងរំសេវ និងតាមផ្លូវកម្ពុជាក្រោម សុទ្ធសឹងតែមានកន្លែងអ៊ុតទូរសព្ទស្អាតៗ។
លោកបានបញ្ជាក់ដែរថា អ្នកដែលតែងតែអ៊ុតទូរសព្ទញឹកញាប់ សុទ្ធតែអាចបញ្ជាក់បានថាជាមនុស្សដែលស្អាតបាតតាមរយៈចេះស្រលាញ់និងទុកដាក់វត្ថុមានតម្លៃរបស់ខ្លួន និងជាមនុស្សដែលមានអត្តចរិតល្អថ្លៃថ្នូរ ហើយដែលតែងទទួលបានការសរសើរពីអ្នកនៅជុំវិញខ្លួន។
អត្ថបទ៖ ដារ៉ាឆានី
0 comments:
Post a Comment