ជនសង្ស័យជួញដូរគ្រឿងញៀនដ៏សកម្មម្នាក់ ត្រូវបានសមត្ថកិច្ចចាប់ឃាត់ខ្លួន
ខេត្តស្ទឹងត្រែង ៖ កម្លាំងសមត្ថកិច្ចខេត្តស្ទឹងត្រែង បានធ្វើការចាប់ឃាត់ខ្លួនជនសង្ស័យម្នាក់ កាលពីវេលាម៉ោង៣ និង៤០នាទីរសៀលថ្ងៃទី៣០ ខែកញ្ញា ឆ្នាំ២០១៣ ស្ថិតនៅចំណុចផ្លូវបំបែកអូរពងមាន់ ភូមិរាជានុកូល សង្កាត់ស្ទឹងត្រែង ក្រុងស្ទឹងសែន ដោយសង្ស័យជាប់ពាក់ព័ន្ធនឹងករណីជួញដូរគ្រឿងញៀន។
បើតាមប្រភពព័ត៌មានពីសមត្ថកិច្ចបានឲ្យដឹងថា ជនសង្ស័យដែលត្រូវសមត្ថកិច្ចចាប់ឃាត់ខ្លួនខាងលើនេះមានឈ្មោះ ធី ចាន់ថា អាយុ៤៥ឆ្នាំ ជាជនជាតិខ្មែរក្រោម និងមានមុខរបរជាកម្មករចៀរជ័រកៅស៊ូនៅខេត្តរតនគិរី។ ប្រភពដដែលបានបន្តឲ្យដឹងទៀតថា សមត្ថកិច្ចបានធ្វើការស្រាវជ្រាវលើមុខសញ្ញានេះជាយូរមកហើយ ទើបដល់ថ្ងៃកើតហេតុ ខណៈដែលជនសង្ស័យកំពុងតែជិះរថយន្តដឹកយកគ្រឿងញៀន ពីភ្នំពេញ ចូលក្នុងខេត្តរតនគិរី ក៏ត្រូវសមត្ថកិច្ចចាប់ឃាត់ខ្លួនបានតែម្តង។
នៅក្នុងប្រតិបត្តិការឃាត់ខ្លួនខាងលើនេះ សមត្ថកិច្ចក៏បានធ្វើការដកហូតបាន វត្ថុតាងថ្នាំញៀនប្រភេទម៉ាទឹកក៣១កញ្ចប់តូច, លុយខ្មែរ១១.៣៥០០រៀល, លុយ៣ដុល្លារ, លុយដុង២ម៉ឺនដុង និងលុយឥណ្ឌូនេស៊ី១០០។
បច្ចុប្បន្នជនសង្ស័យ ត្រូវបានសមត្ថកិច្ចឃុំខ្លួនជាបណ្តោះអាសន្ន ដើម្បីធ្វើការសាកសួរ និងកសាងសំណុំរឿងបញ្ជូនខ្លួនទៅកាន់តុលាការចាត់ការទៅតាមនីតិវិធីច្បាប់៕
ប្រភពពី៖ www.watphnom-news.com
0 comments:
Post a Comment