ទោះបីជាមានវ័យជ្រេបន្តិចទៅហើយក៏ពិតមែន ប៉ុន្តែតារាសម្ដែងជើងចាស់លោក ទេព រិនដារ៉ូ នៅតែមានទីផ្សារសម្ដែងជាប់គ្នារដឹកស្ទើរដកខ្លួនមិនរួចទៅហើយ។ ជាក់ស្ដែង នៅក្នុងខែនេះជាដើម លោកត្រូវបានម្ចាស់ផលិតកម្មអញ្ជើញឲ្យថត ៤រឿងផ្សេងគ្នា។
“សូម្បីតែឱកាសកាន់បិណ្ឌនេះ ក៏ដកខ្លួនទៅមិនបានដែរ បានតែផ្ញើបច្ច័យតាមបងប្អូនប៉ុណ្ណោះ”។ លោកបញ្ជាក់ថា អ្វីដែលនាំឲ្យមានការខកខានដូច្នេះ ដោយសារតែត្រូវចុះទៅសម្ដែងនៅខេត្តផង និងនៅភ្នំពេញផង។
បច្ចុប្បន្នតារាសម្ដែងជើងចាស់លោក ទេព រិនដារ៉ូ កំពុងចូលរួមសម្ដែងក្នុងរឿង “បេសកកម្មស៊ីម២” របស់ផលិតកម្មRGB រឿង “Memory” របស់ផលិតកម្ម Town និងរឿង “អស្ចារ្យណាស់លោកប្ដីខ្ញុំ” របស់ស្ថានីយទូរទស្សន៍ប៉ុស្តិ៍បាយ័ន។ ចំណែកឯភាពយន្តដែលលោកបានទទួលថតពីពេលមុននោះ ទើបតែបញ្ចប់កាលពីយប់មិញប៉ុណ្ណោះ។
អាន៖ ទេព រិនដារ៉ូ ក្លាយជាតួចិត្តអាក្រក់
“យើងបាននិយាយគ្នាជាមុនរួចទៅហើយជាមួយផលិតកម្មនីមួយៗ ដើម្បីបែងចែកពេលវេលាថត ដោយមិនមានបញ្ហានោះទេ”។ ផលិតកម្មនីមួយៗ ក៏បានទទួលយកលក្ខខណ្ឌនេះដែរ។ ទោះយ៉ាងណា ភាពយន្តទាំងអស់ អាចនឹងត្រូវថតបញ្ចប់នៅចុងខែក្រោយនេះ ហើយលោកក៏ពិចារណាលើកុងត្រាថតរឿងថ្មីទៀតប្រសិនបើមាននោះ។
ទោះបីជាបែបនេះក្ដី លោកថា ប៉ុណ្ណេះក៏មិនទាន់រវល់ដូចពីមុនដែរ។ លោកថា កាលពីទសវត្ស ៩០លោកត្រូវឆ្លៀតពេលថតមួយសប្ដាហ៍ចំនួន ៣រឿងក៏មានដែរ ព្រោះកាលនោះលោកនៅក្មេង និងត្រូវដើរតួឯកក្នុងរឿងប្រើពេលវែង ព្រមទាំងទទួលកុងត្រារឿងថ្មីជាបន្តបន្ទាប់ទៀតផង ហើយមានពេលខ្លះ ត្រូវបង្ខំចិត្តមិនទទួលថតរឿងមួយចំនួនតែម្ដង។
អាន៖ ទេព រិនដារ៉ូ ចង់ឲ្យអ្នកសិល្បៈបម្រើអ្នកគាំទ្រ
ជាចុងក្រោយ ក្នុងនាមជាតារាសម្ដែងជើងចាស់មួយរូបលោក ទេព រិនដារ៉ូ បានចាប់អារម្មណ៍ថា ការផលិតភាពយន្តខ្មែររីកចម្រើនបន្តិចហើយ ខណៈដែលផលិតករម្នាក់ៗមានការប្រឹងប្រែងជាងមុន។ លោកថា ៖” ខ្ញុំឃើញប៉ុន្មានរឿងចុងក្រោយនេះ អ្នកផលិតភាពយន្តមានការសម្រិតសម្រាំងជាងមុនច្រើនណាស់ សូម្បីតែរបៀបសម្ដែងនោះ ក៏មានការខុសប្លែកច្រើនដែរ”។
លោក ទេព រិនដារ៉ូ ជាតារាសម្ដែងជើងចាស់មួយរូប ដែលធ្លាប់ទទួលបានកេរ្តិ៍ឈ្មោះល្បីខ្ទរខ្ទារអំឡុងទសវត្សឆ្នាំ១៩៩០ ជាមួយតារាសម្ដែងអ្នកនាង អម្ពរទេវី អ្នកនាង សុខ ស្រីមុំ លោក យុត្ថារ៉ា ឆានី លោក ហម ឈរ៉ា និងតារារួមជំនាន់ជាច្រើនទៀត។ លោកក៏ធ្លាប់ទទួលបានគ្រឿងឥស្សរិយយសមួយចំនួនពីអតីតព្រះមហាក្សត្រ ព្រះករុណា ព្រះបាទសម្ដេចព្រះនរោត្ដមសីហនុ ព្រះបរមរតនកោដ សម្ដេចតានៃយើង បន្ទាប់ពីបានដង្ហែតាម និងចូលរួមសម្ដែងភាពយន្តមួយចំនួនជាស្នាព្រះហស្តរបស់ព្រះអង្គ៕
អាន៖ ទេព រិនដារ៉ា”គ្រាមួយសម្ដេចតាធ្លាប់ឱបខ្ញុំ”
អត្ថបទ៖ សំ ជំនាញ
0 comments:
Post a Comment