តារាហូលីវូដ ៤ដួងដែលល្បីតាមអ៊ិនធឺណិតថាស្លាប់
ប្រព័ន្ធផ្សព្វផ្សាយពិតជាដើរតួសំខាន់ណាស់ក្នុងការពាំនាំព័ត៌មានទាន់ហេតុការណ៍ និងពិតៗដល់មិត្តអ្នកអាន ស្ដាប់ និងទស្សនា។ ប៉ុន្តែមានការផ្សព្វផ្សាយមួយចំនួនដែលមានលក្ខណៈមិនពិតនិងធ្វើឲ្យមានការភ័ន្តច្រឡំនិងភ្ញាក់ផ្អើលកើតឡើង។ ដូចតារាហូលីវូដ៤ដួងខាងក្រោមនេះធ្លាប់ត្រូវបានល្បីថាស្លាប់ដោយមានការចុះផ្សាយតាមបណ្ដាញសង្គម និងប្រព័ន្ធផ្សព្វផ្សាយមួយចំនួន។
១. Jackie Chan៖
កាលពីថ្ងៃទី២៩ មីនា ២០១១មានគេហទំព័រក្លែងក្លាយមួយបានបង្កើតឡើងដែលមានទម្រង់ស្រៀងគ្នានឹងកម្មវិធីទូរទស្សន៍ បានអះអាងថាលោក ឈិន ឡុងបានស្លាប់ដោយសារជំងឺគាំងបេះដូងនៅមន្ទីរពេទ្យរដ្ឋ Los Angeles និងធ្វើឲ្យមានការភ្ញាក់ផ្អើលជាខ្លាំងពីសំណាក់អ្នកគាំទ្រលោក។ នៅពេលនោះដែរមានការសរសេររំលែកទុក្ខនិងសោកស្ដាយចំពោះការស្លាប់របស់លោក ឈិន ឡុង ដែលក្នុងនោះមានទាំងលោក Obamaផងដែរ។ ប៉ុន្តែការពិត ព័ត៌មាននោះគ្រាន់តែជាការបោកប្រាស់តែប៉ុណ្ណោះ។
២. Britney Spears ៖
កម្មវិធីវិទ្យុមួយនៅទីក្រុង Dallas សហរដ្ឋអាមេរិកបានផ្សាយព័ត៌មានមួយថាកាលពីថ្ងៃទី១២ មិថុនា ២០០១ តារាចម្រៀងដ៏ល្បីគឺ Britney Spearsបានស្លាប់ដោយសារតែគ្រោះថ្នាក់ចរាចរណ៍ជាមួយឡានដឹកឥវ៉ាន់មួយ។ ព័ត៌មាននេះបានធ្វើឲ្យអ្នកគាំទ្រមានការងឿងឆ្ងល់និងមានការចែកចាយតៗគ្នាស្ទើរទូទាំងពិភពលោក។ ឆ្លើយតបនឹងព័ត៌មានមិនពិតនេះ ស្ថានីយវិទ្យុ Dallasបានឲ្យដឹងថាការផ្សាយនេះគឺជាការផ្សាយរបស់ DJវិទ្យុ២នាក់ដោយប្រើរបាយការណ៍បោកប្រាស់ ហើយក្រោយពីនោះមក DJ ទាំងពីរនាក់ក៏ត្រូវបានគេបញ្ឈប់ពីការងារ។
៣. Miley Cyrus ៖
មិនខុសពីអ្នកទាំងពីរខាងលើ តារាចម្រៀងស្រីវ័យក្មេងMiley Cyrus ក៏ធ្លាប់បានទទួលព័ត៌មានអកុសលតាម Internet ថានាងបានស្លាប់ដោយសារគ្រោះថ្នាក់ចរាចរណ៍ផងដែរ កាលពីខែកញ្ញា ២០០៨។ ព័ត៌មានមួយនោះត្រូវបានចុះផ្សាយលើគេហទំព័រ Yahoo ដែលបានបញ្ជាក់ថា Miley Cyrus ពិតជាស្លាប់មែនដោយសារបុកគ្នាជាមួយរថយន្តដែលបើកដោយបុរសស្រវឹងម្នាក់ ហើយក៏មាន Hackerម្នាក់បានបង្កើតវីដេអូនិងបង្ហោះតាម Youtubeទៀតផង។ ដោយសារតែរឿងនេះ អ្នកគាំទ្របានភ្ញាក់ផ្អើលជាខ្លាំងបន្ទាប់បានឃើញMiley Cyrus ចូលរួមការប្រគំតន្ត្រីមួយនៅទីក្រុង New York ក្រោយព័ត៌មានអកុសលនោះបានចុះផ្សាយរួចមក។
៤. Zach Braff ៖
ធ្លាប់មានការចុះផ្សាយលើគេហទំព័រ CNN កាលពីឆ្នាំ២០០៩ ថាលោកZach Braff បានស្លាប់ក្នុងផ្ទះរបស់លោកដោយសារតែប្រើប្រាស់ថ្នាំហួសកម្រិត។ ព័ត៌មានរសើបនេះបានធ្វើឲ្យមានការចែកចាយតៗគ្នាតាម Twitter ហើយក៏មានអ្នកខ្លះនិយាយថា Zach Braffស្លាប់ដោយសារខ្មោចលោកJeff Goldblum លងក្នុងផ្ទះរបស់គាត់។ ពេលបានឃើញការភ្ញាក់ផ្អើលនេះ Zach Braffមិនបង្អង់យូរ បានថតឃ្លីបវីដេអូផ្សាយតាម Internetដើម្បីបដិសេធព័ត៌មានមិនពិតខាងលើនេះ។
0 comments:
Post a Comment