ព្រាប សុវត្ថិ ច្រៀងបទខ្មែរនិពន្ធនៅជប៉ុន
ភ្នំពេញ : ដោយជឿជាក់លើទេពកោសល្យនិងប្រជាប្រិយភាព លើបទពិសោធសិល្បៈជិត២០ឆ្នាំ រហូតគ្រងតំណែងតារាចម្រៀងលំដាប់កំពូលប្រចាំនៅស្រុកខ្មែរ ជាមួយនឹងការសម្រិតសម្រាំងបទចម្រៀងថ្មី ដែលជាស្នាដៃនិពន្ធដោយកូនខ្មែរសុទ្ធមួយរយភាគរយលើកពីវប្បធម៌ សិល្បៈខ្មែរផងនោះ លោក ព្រាប សុវតិ្ថ បានអះអាងយ៉ាងមុតមាំថា នឹងនាំយកភាពជោគជ័យឲ្យខានតែបាន ដើម្បីជាតិខ្មែរ សម្រាប់កម្មវិធី (Asian Pop)នៅជប៉ុនឆ្នាំ២០១៣នេះ។
តារាចម្រៀង ផលិតកម្មហង្សមាសលោក ព្រាប សុវត្ថិ ត្រូវបានគេដឹងថា ធ្លាប់បានពាំនាំសិល្បៈចម្រៀង ដែលបញ្ជាក់ពីលក្ខណៈវប្បធម៌ប្រពៃណីខ្មែរ ទៅចូលរួមសម្តែងក្នុងកម្មវិធី (Asian Pop) នៅប្រទេសជប៉ុនម្តងរួចហើយកាលពីឆ្នាំ២០០៣។ ពេលនោះក៏បាននាំមកវិញនូវភាពជោគជ័យ និងលើកស្ទួយមុខមាត់ប្រទេសខ្មែរនៅលើឆាកអន្តរជាតិខ្លាំងផងដែរ។ ប៉ុន្តែដោយឡែកដំណើរដែលប្រកបដោយមោទនភាព សម្រាប់វត្តមានចូលរួមកម្មវិធី (Asian Pop) ឆ្នាំ២០១៣នេះ តារាចម្រៀង គ្រងតំណែង លំដាប់កំពូល ជាច្រើនឆ្នាំ ជាប់ៗគ្នា ប្រចាំផលិតកម្មហង្សមាស លោក ព្រាប សុវត្ថិ បន្ទាប់ពីបានដឹងថាលោកត្រូវទៅចូលរួមក្នុងកម្មវិធី គម្រប់ខួប៤០ឆ្នាំ ដែលមានប្រទេសសមាជិកអាស៊ានចូលរួមនោះ លោកបានឲ្យកវីនិពន្ធល្បីឈ្មោះលោក សួន ពិសិដ្ឋ និពន្ធបទចម្រៀងជាពិសេសដល់លោក ដើម្បីយកទៅបកស្រាយនៅក្នុងកម្មវិធី និងបង្ហាញឲ្យសកលលោកបានយល់ដឹងពីវប្បធម៌ប្រពៃណីរបស់ខ្មែរ។ លើសពីនេះទៅទៀតការចូលរួមកម្មវិធីនេះ បានធ្វើឲ្យលោក ព្រាប សុវត្ថិ សង្ឃឹម ជឿជាក់យ៉ាងខ្លាំងថា នឹងទទួលបានជោគជ័យ លើកស្ទួយមុខមាត់ប្រទេសជាតិ នៅលើឆាកអន្តរជាតិ។
តារាចម្រៀង លោក ព្រាប សុវត្ថិ បានឡើងយន្តហោះ ចេញទៅសម្តែងនៅ ប្រទេសជប៉ុន កាលពីថ្ងៃទី២៦ ខែវិច្ឆិកា ឆ្នាំ២០១៣ វេលាម៉ោង៧យប់ ដោយពាំនាំទៅជាមួយក្រុមរាំផ្ទាល់ខ្លួនរបស់ផង ហើយលោកបានត្រៀមបទចម្រៀងចំនួន២បទ យកទៅសម្តែង និងច្រៀងអបអរសាទរ ខួប៤០ឆ្នាំ ក្នុងកម្មវិធី Asian Pop រយៈពេល៥ថ្ងៃ។
ថ្លែងពីក្តីសង្ឃឹម ជាមោទនភាពដើម្បីជាតិខ្មែរនោះ លោក ព្រាប សុវត្ថិ បានអះអាងមុនចេញដំណើរថា៖ «ក្នុងដំណើរចេញទៅប្រទេសជប៉ុនចូលរួមកម្មវិធីគម្រប់ខួប៤០ ដែលមានប្រទេសជាសមាជិកអាស៊ាន១១ប្រទេសចូលរួមនោះខ្ញុំមានការ ជឿជាក់ថានឹងទទួលបានជោគជ័យ ខ្លាំងជាងកាលពី១០ឆ្នាំមុន »។ លោក ព្រាប សុវត្ថិ បានបញ្ជាក់ថា៖ «បទចម្រៀងពីរបទដែលត្រៀមយកទៅច្រៀង គឺជាបទចម្រៀងនិពន្ធរៀបរាប់ពីប្រទេសជាតិ សម្បត្តិបេតិកភណ្ឌ ពិភពលោករបស់ខ្មែរ។ បទចម្រៀងទាំងនោះមាន២បទ នឹងធ្វើឲ្យប្រទេសសមាជិកអាស៊ានទាំងអស់បានដឹង និងស្គាល់ពីកម្ពុជាកាន់តែច្រើនជាងមុន»។
តារាចម្រៀងមានភាពលេចធ្លោខ្លាំង ប្រចាំផលិតកម្មហង្សមាសរូបនេះ ក៏បានបង្ហាញពីអារម្មណ៍ផ្ទាល់ ដែលលោកបានទៅកាន់កម្មវិធីលំដាប់អន្តរជាតិនេះជាថ្មីទៀត ដោយលោកនិយាយថា៖ «ខ្ញុំពិតជាសប្បាយចិត្ត និងមានមោនទភាព បានទៅបង្ហាញឲ្យពិភពលោកទទួលស្គាល់ អ្វីដែលជាអរិយធម៌ខ្មែរ និងអ្វីជាសិល្បៈរបស់យើង បូករួមជាមួយការរីកចម្រើន ព្រោះពេលវេលានេះ ជាពេលវេលាមួយ ដែលយើងទៅ បង្ហាញអ្វី ដែលមានដ៏អស្ចារ្យ នៅក្នុងប្រទេសយើង ដល់បរទេសឲ្យដឹង»។
បទចម្រៀង ចំនួនពីរបទដែលកំពូលតារាចម្រៀង ប្រចាំផលិតកម្មហង្សមាស នាំយកទៅបង្ហាញក្នុងកម្មវិធី(Asian Pop) នៅជប៉ុនឆ្នាំ២០១៣ និងជឿជាក់ថា ប្រទេសក្នុងសមាគមន៍អាស៊ាន ស្គាល់ខ្មែរកាន់តែច្បាស់នោះ ត្រូវបានលោក ព្រាប សុវត្ថិ បញ្ជាក់ថា៖ «ក្រោមស្នាដៃនិពន្ធបទភ្លេងរបស់លោក សុខ ជំនោរ និងទំនុកច្រៀងរបស់កវីចំណូលថ្មីរបស់ផលិតកម្មរស្មីហង្សមាសលោក សួន ពិសិដ្ឋ។
លោកបានរៀបរាប់ឲ្យដឹងទៀតថា៖ «ទាំងពីរបទនោះមានចំណងជើងថា «យើងមានបេះដូង» និងបទ «Kingdom of wonder » ដែលសុទ្ធសឹងជាបទចម្រៀងរៀបរាប់ពីវប្បធម៌ប្រពៃណី រួមទាំងសម្បត្តិបេតិកភណ្ឌដ៏សម្បូរបែបរបស់កម្ពុជា»៕
តារាចម្រៀងជើងចាស់ ព្រាប សុវត្ថិ ឡើងច្រៀងលើឆាកប្រគំតន្ត្រី។ រូបថត ផា លីណា
ប្រភពពី៖ www.khmer-note.com
0 comments:
Post a Comment