កុមារា មាស សាម៉ន អតីតអ្នករើសអេតចាយ ត្រូវបានគេប្រដូចគ្រប់គ្នាថា ច្រៀងដូចលោក ខេមរៈ សិរីមន្ត។ ដោយសារស្ទិល និង ច្រៀងដូច ខេមរៈ សិរីមន្ត កុមារា រូបនេះបានក្លាយទៅជាអ្នកចម្រៀងថតដាក់ថាស នៅអាយុ១៥ឆ្នាំ បន្ទាប់ពីអតីតជាអ្នករើសអេតចាយ កាលពីឆ្នាំ ២០០៩។
ឮឈ្មោះ មាស សាម៉ន កុំច្រឡំថា កុមារារូបនេះ ជាប់សែស្រឡាយ អ្នកចម្រៀងកំប្លែងត្លុក មិនចេះកើតទុក្ខ ទឹកមុខស្រស់ស្រាយ បង្កើតភាពសប្បាយរីករាយលាយនឹងសំណើចក្អាកក្អាយ ដែលជាម្ចាស់បទ “សម្លកូនអុក”ឲ្យសោះ។ ប៉ុន្ដែ កុមារា មាស សាម៉ន រូបនេះ គឺជាអតីតអ្នករើសអេតចាយ ម្នាក់ ដែលកើតក្នុងត្រកូលខ្សត់ខ្សោយមួយ រកព្រឹកខ្វះ ល្ងាច និងគ្មានសែស្រឡាយជាអ្នកសិល្បៈអ្វីនោះទេ។
សូមចុចអាន៖ កុមារា សារ៉េត រតនៈ អាចជំនួសតំណែងរ៉ូលីនបានអត់ប៉ុណ្ណឹង?
លោក មាស សុផាត អាយុ ៤៧ឆ្នាំ ដែលត្រូវជាឪពុករបស់កុមារា មាស សាម៉ន រស់នៅភូមិព្រែកទាល់ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ បានប្រាប់គេហទំព័រយើងខ្ញុំថា កូនរបស់លោកមានទេពកោសល្យខាងសិល្បៈតាំងពីតូចមក។ ក្នុងចំណោមបងប្អូន ៤នាក់ ស្រី២ ប្រុស២ ក្នុងនោះ សាម៉ន ជាកូនច្បងម្នាក់គត់ ដែលមានទេពកោសល្យខាងសិល្បៈ។
“ខ្ញុំគ្មានសែស្រឡាយឯណាជាប់សិល្បៈនោះទេ ជីតាវា ឈ្មោះមាស ហើយខ្ញុំដាក់ឈ្មោះកូនថា សាម៉ន ដូច្នេះហើយ មានគេច្រឡំថា មាស សាម៉ន តារាចម្រៀងជើងចាស់។ តាមពិតទៅខ្ញុំនឹកស្មានមិនដល់នោះទេ ចំពោះការដាក់ឈ្មោះនេះ”។
សូមចុចអាន៖ កុមារី ហ៊ិន លីដា ច្រៀងពីរោះធ្វើឲ្យតារាជើងចាស់ខ្លះសុំខ្មាស
ពីអាយុ១២-១៤ ឆ្នាំ មាស សាម៉ន គឺជាក្មេងរើសអេតចាយ។ លុះដើរដល់ម្ដុំផ្សារផារ៉ាហ្គន សាម៉ន ឃើញគេដាក់ពាក្យប្រឡងចម្រៀង សាម៉ន ក៏បានសម្រេចចិត្ត ទៅសុំប្រាក់ពី ម្ដាយ ដើម្បីទិញពាក្យ និងបំពេញពាក្យចូលរួមប្រឡង ហើយនៅទីបំផុត សាម៉ន អាចដណ្ដើមបានយកជ័យលាភីលេខ១។ នេះជាការបញ្ជាក់របស់ លោក មាស សុផាត ដែលត្រូវជាឪពុករបស់ មាស សាម៉ន។
មកដល់អាយុ១៥ ឆ្នាំ មាស សាម៉ន ត្រូវបានស្ថានីយទូរទស្សន៍ហៅឡើងច្រៀងកាលពីឆ្នាំទៅមិញ ដែលការចាប់ផ្ដើមដំបូង សាម៉ន បានយកស្ទិលតាម លោកខេមរៈ សិរីមន្ត។ ក្រោយមកទៀតត្រូវបានគេទទួលស្គាល់ទឹកដមសំឡេងរបស់សាម៉នថា ច្រៀងដូច ខេមរៈ សិរីមន្ត ដោយបន្ទាប់មកទៀត កុមារាសាម៉ន ត្រូវបានផលិតកម្មស្ទឹងមាសទាក់ទងយកទៅច្រៀង។
លោក មាស សុផាត បានបញ្ជាក់ថា “រហូតមកទល់នឹងពេលនេះ កូនខ្ញុំច្រៀងបានពីរវ៉ុលហើយ ហើយបានឡើងច្រៀងលើឆាកតន្ត្រីទៀតផង។
ឪពុក ដែលជាអ្នករត់ម៉ូតូឌុប និងម្ដាយ ជាអ្នកលក់ចាប់ហ៊ួយ និងបន្លែនៅផ្ទះ រូបនេះ បានអំពាវនាវឲ្យម្ចាស់ស្ថានីយទូរទស្សន៍ ឧស្សាហ៍ហៅកូនឡើងច្រៀង ដើម្បីបានកម្រៃខ្លះៗ គ្រាន់ឲ្យ សាម៉ន បានយកប្រាក់ទៅរៀន ដើម្បីឲ្យការសិក្សាចប់ចុងចប់ដើម។ បច្ចុប្បន្ននេះ មាស សាម៉ន អាយុ១៦ ឆ្នាំ កំពុងរៀនថ្នាក់ទី៧ នៃអនុវិទ្យាល័យជាស៊ីមសាមគ្គី។
“ខ្ញុំគ្មានប្រាក់ឲ្យកូនរៀនទេ កាលពីនៅតូចសាម៉ន រើសអេតចាយយកលុយទៅរៀន ឥឡូវគ្រាន់បានគេហៅឡើងច្រៀងបានលុយតិចតួច គ្រាន់តែបានការសិក្សារបស់គេប៉ុណ្ណោះ គឺនៅមិនទាន់អាចជួយគ្រួសារបាននៅឡើយទេ។ ដូច្នេះ ខ្ញុំសង្ឃឹមថា មានគេហៅឲ្យចូលរួមកម្មវិធីឲ្យបានច្រើន គឺកូនខ្ញុំនឹងមានក្ដីសង្ឃឹមថា នឹងអាចរៀនចប់ចុងចប់ដើមជាមិនខាន”។ លោកមាស សុផាត និយាយ៕
អត្ថបទ៖ ប៊ិន ប៊ុណ្ណា
រូបថត៖ youtube
0 comments:
Post a Comment