រថយន្តកុងតឺន័ររបស់ក្រុមហ៊ុនផែស្ងួត តេងឡាយ ដឹកធ្ងន់ផុងជង្ហុកផ្អៀង សង្កត់ផ្ទះប្រជាពលរដ្ឋរងការខូចខាត
រាជធានីភ្នំពេញ ៖ រថយន្តកុងតឺន័រ ១គ្រឿង របស់ក្រុមហ៊ុនផែស្ងួត តេងឡាយ ដឹកធ្ងន់ពេក ខណៈពេលបើកបរតាមផ្លូវ ក៏បានផុងជង្ហុកធ្វើឲ្យផ្អៀងចំហៀង ខាងស្តាំសង្កត់លើរបងផ្ទះប្រជាពលរដ្ឋ ១ខ្នង បណ្តាលឲ្យរងការខូចខាតមួយចំនួន ដែលហេតុការណ៍នេះ បានកើតឡើងកាលពីវេលាម៉ោង ៨ និង ៥០យប់ ថ្ងៃទី២៨ វិច្ឆិកា ២០១៣ តាមបណ្តោយផ្លូវ៣៧១ ស្ថិតក្នុងភូមិត្នោតជ្រំទី៤ សង្កាត់បឹងទំពុន ខណ្ឌមានជ័យ។
តាមប្រភពព័ត៌មាន បានឲ្យដឹងថា រថយន្តកុងតឺន័រម៉ាកពុយហ្ស៊ូ ១គ្រឿង ពណ៌ខៀវ ពាក់ស្លាកលេខ ភ្នំពេញ 3C-1661 របស់ក្រុមហ៊ុនផែស្ងួត តេងឡាយ ដឹកធ្ងន់បើកបរពីទិសខាងកើតទៅលិច ខណៈមកដល់ចំណុចកើតហេតុ បានផុងជង្ហុក ហើយក៏ផ្អៀងទៅចំហៀងខាងស្តាំ សង្កត់របងផ្ទះប្រជាពលរដ្ឋតែម្តង សំណាងគ្មានមនុស្សរងគ្រោះថ្នាក់។ នៅក្នុងហេតុការណ៍នេះ បណ្តាលឲ្យមានការកកស្ទះ ចរាចរណ៍ប្រមាណជាង ១ម៉ោង ផងដែរ។
ក្រោយកើតហេតុ រថយន្តខាងលើត្រូវសមត្ថកិច្ច នាំយកទៅរក្សាទុកនៅការិយាល័យ ចរាចរណ៍ជើងគោករាជធានីភ្នំពេញ៕
0 comments:
Post a Comment