បទចម្រៀងរបស់អធិរាជសំឡេងមាស លោក តា ស៊ីន ស៊ីសាមុត និង លោកយាយ រស់ សិរីសុទ្ធា នៅតែដិតជាប់ក្នុងអារម្មណ៍មហាជនខ្មែរគ្រប់ស្រទាប់វណ្ណៈមិនថា ចាស់ ឬក្មេងនោះទេ បើទោះជាលោកទាំងពីរបានចែកឋានយូរហើយក្ដី។ ចុះប្រសិនបើកំពូលតារាចម្រៀង ព្រាប សុវត្ថិ និង កញ្ញា មាស សុខសោភា ចាប់ដៃគូនឹងគ្នាវិញ អាចធ្វើឱ្យពួកគេល្បីរន្ទឺ ហើយរក្សាកេរ្តិ៍ឈ្មោះដូច លោកតា លោកយាយ ទាំងពីរបានទេ?
កញ្ញា មាស សុខសោភា និង លោក ព្រាប សុវត្ថិ (រូបថត៖ Facebook ព្រាប សុវត្ថិ)
អានអត្ថបទ៖ ស្លុងអារម្មណ៍ណាស់…តារាល្បីៗច្រៀងពីពលិកម្មអ្នកមានគុណរៀងខ្លួន!
សំនួរនេះបានចាក់ចំបេះដូងទស្សនិកជនខ្មែរ ទាំងអ្នកចូលចិត្តប្រើប្រាស់បណ្ដាញសង្គម Facebook ក៏ដូចជាមហាជនខាងក្រៅ ជាពិសេសពីសំណាក់មិត្តៗយុវវ័យ។
អ្វីដែលសំខាន់នោះពួកគេសុទ្ធតែចង់ឱ្យតារាចម្រៀងមានទឹកដមសំនៀងពីរោះដូចគ្នានេះ ចាប់ដៃគ្នាដើម្បីបកស្រាយបទចម្រៀង។
ជាក់ស្ដែង អ្នកប្រើប្រាស់បណ្ដាញសង្គម Facebook ម្នាក់ឈ្មោះ sokunthea បញ្ចេញចំណាប់អារម្មណ៍ថា លោក ព្រាប សុវត្ថិ និង កញ្ញា មាស សុខសោភា សុទ្ធតែជាតារាល្បី ហើយមានទឹកដមសំនៀងខ្ពស់ដូចគ្នា។
ប្រសិនណាបើបានច្រៀងរួមគ្នានោះ ពិតជាពីរោះលើសតារានានាក្នុងស្រុកខ្មែរ។ “ពួកគាត់ទាំងពីរនៅផលិតកម្មផ្សេងគ្នា មិនដែលបានចេញបទចម្រៀងរួមគ្នាទេ តែបើសិនជាអាចច្រៀងរួមគ្នាបានមិនដឹងជាល្អយ៉ាងណាទេ”។
អានអត្ថបទ៖ ចង់ដឹងថ្លៃខ្លួនតារាស្រុកខ្មែរអត់?
លើកឡើងដោយមានជំនឿជាក់ថាកញ្ញា មាស សុខសោភា និងលោក ព្រាប សុវត្ថិ ពិតជាអាចរក្សាកេរ្តិ៍ឈ្មោះបានដូច លោកតា ស៊ីន ស៊ីសាមុត និង លោកយាយ រស់ សិរីសុទ្ធា ប្រសិនណាបើចាប់ដៃគូច្រៀងរួមគ្នា ដោយ មាស វុទ្ធី ជានិស្សិតឆ្នាំទី២មកពីសាកលវិទ្យាល័យ ភូមិន្ទកសិកម្ម លើកឡើងថា៖ “ដូចដឹងស្រាប់ហើយមិនថាតែខ្ញុំទេ អ្នកណាៗ ក៏ទទួលស្គាល់ពួកគាត់ទាំងពីរច្រៀងពីរោះដូចគ្នាដែរ ហើយគាត់ចាប់ដៃគ្នាខ្ញុំគិតថា ពិតជាអាច ដូចនឹងលោកតា ស៊ីន ស៊ីសាមុត និងលោកយាយ រស់ សិរីសុទ្ធា បាន”។
ដោយឡែកអ្នកប្រើប្រាស់បណ្ដាញសង្គម Facebook ម្នាក់ឈ្មោះកញ្ញា yako soki រស់នៅខេត្តសៀមរាប បានបញ្ចេញចំណាប់អារម្មណ៍ថា បើទោះជា កញ្ញាគិតថា លោក ព្រាប សុវត្ថិ និង កញ្ញា មាស សុខសោភា មានទឹកដមសំនៀងមិនអាចប្រៀបនឹង លោកតា ស៊ីន ស៊ីសាមុត និង លោកយាយ រស់ សិរីសុទ្ធា បានយ៉ាងណាក្ដី។ ប៉ុន្តែកញ្ញា ចង់ឱ្យតារាទាំងពីររូបនេះបកស្រាយបទចម្រៀងរួមគ្នា ដើម្បីបំពេញតម្រូវការរបស់ទស្សនិកជនអ្នកស្ដាប់។
កញ្ញាបញ្ជាក់ថា៖ “ខ្ញុំគិតថាបង ព្រាប សុវត្ថិ គាត់ធ្លាប់ច្រៀងជាមួយអស់ហើយតារាល្បីស្រីៗចាស់ក្មេងបច្ចុប្បន្ន នៅតែ មាស សុខសោភា មួយទេ ហើយបើគាត់ទាំងអាចច្រៀងរួមគ្នាបាននោះកាន់តែប្រសើរថែមទៀត”។
អានអត្ថបទ៖ មើលមុខតារាៗ មុន និងក្រោយពេលល្បីតិចមើល!
ងាកទៅរក លោក ចាន់ប៊ី បម្រើការងារក្នុងក្រុមហ៊ុនមិត្តហ្វូនឯណោះវិញ លោកក៏ចង់ឱ្យតារាល្បីឈ្មោះទាំងពីរចាប់ដៃគូច្រៀងរួមគ្នាដែរ ព្រោះចង់ដឹងថាតើពីរោះកម្រិតណា។ ក៏ប៉ុន្តែបុគ្គលិករូបនេះលើកឡើងថា ប្រសិនចាប់ដៃគូរួមគ្នាសូមឱ្យបកស្រាយចម្រៀង ដែលបង្កើតឡើងដោយស្នាដៃខ្មែរ កុំលួចចម្លងពីបរទេសដូចបច្ចុប្បន្ន។
លោក ចាន់ប៊ី អះអាងថា៖ “ខ្ញុំចង់ឱ្យច្រៀងរួមគ្នា ក៏ប៉ុន្តែកុំចម្លងពីគេព្រោះមិនជាការល្អទេ តារាលំដាប់ប្រទេសបែរជាលួចបទចម្រៀងគេច្រៀងពិតជាខ្មាសគេមិនខាន”។
អានអត្ថបទ៖ កេរ្តិ៍ឈ្មោះអាចខុសគ្នាឆ្ងាយ តែរឿងម៉ូដសក់នែ…!
តារាស្រីទាំងចាស់ និងក្មេងល្បីៗបច្ចុប្បន្នសុទ្ធតែធ្លាប់បកស្រាយបទចម្រៀងជាមួយ លោក ព្រាប សុវត្ថិ តួយ៉ាងដូចជាអ្នកស្រី ហ៊ឹម ស៊ីវន អ្នកនាង ម៉េង កែវពេជ្ជតា កញ្ញា ពេជ្រ សោភា កញ្ញា ឱក សុគន្ធកញ្ញា ជាដើម។ ដោយឡែកសម្រាប់ កញ្ញា មាស សុខសោភា វិញ លោក ព្រាប សុវត្ថិ មិនធ្លាប់មានបទចម្រៀងច្រៀងរួមគ្នាទេ ព្រោះនៅផលិតកម្មផ្សេងគ្នា ក៏ប៉ុន្តែក្នុងការប្រគំតន្ត្រីមួយចំនួនពួកគេធ្លាប់បកស្រាយចម្រៀងរួមគ្នា។
តារាចម្រៀងលំដាប់កំពូលប្រចាំប្រទេសកម្ពុជា ទាំងពីរសុទ្ធតែធ្លាប់ទទួលបានពានរង្វាន់ពីកម្មវិធីអាណាចក្រតារា ដោយ លោក ព្រាប សុវត្ថិ ទទួលពានជាកំពូលតារាចម្រៀងប្រចាំឆ្នាំ ២០១២។ ឯមាស សុខសោភា ទទួលបានពានតារាចម្រៀងសម័យស្រីសំឡេងពីរោះ ប្រចាំឆ្នាំ ២០១៣។
តើប្រិយមិត្តចង់ឱ្យអ្នកទាំងពីរចាប់ដៃគូច្រៀងរួមគ្នាទេ ហើយថាបើសិនជាអ្នកទាំងពីរចាប់ដៃគូរួមគ្នាអាចមានកេរ្តិ៍ឈ្មោះដូចលោកតា ស៊ីន ស៊ីសាមុត និងលោកយាយ រស់ សិរីសុទ្ធា បានទេ?
អត្ថបទ៖ អ៊ីង សុឡា
រូបថត៖ Facebook Preab Sovath
0 comments:
Post a Comment