iPhone តម្លៃរាប់រយ ត្រូវគេគិតថាគឺសម្រាប់ទីផ្សារអ្នកមានៗមួយចំនួនតូចតែប៉ុណ្ណោះ ដែលមានលទ្ធភាពចំណាយទ្រព្យធនទិញវត្ថុដ៏មានតម្លៃនេះបាន។ ប៉ុន្តែ មិនអីចឹងទាំងអស់ឯណា អ្នកខ្លះមិនសូវសំបូរលុយកាក់ ក៏ចាប់អារម្មណ៍និងខិតខំរកលុយគ្រប់មធ្យោបាយ ធ្វើឲ្យយ៉ាងណាអាចក្លាយជាកម្មសិទ្ធិទូរសព្ទដ៏ទំនើបនេះ បើទោះបីត្រូវចំណាយអស់ប៉ុណ្ណាក៏គ្មានសោកស្តាយនោះទេ។
ដូចនិស្សិតសិក្សាជំនាញព័ត៌មានវិទ្យានៅសាកលវិទ្យាល័យបៀលប្រាយ រស្មី ប្រាប់ថា មិនប្រាកដថាអ្នកមាននោះទេ ដែលជាអ្នកចូលចិត្តប្រើ iPhone ប៉ុន្តែអ្នកក្រមួយចំនួនក៏មានភាពស៊ីវិល័យលើការទិញទូរសព្ទទំនើបៗប្រើនោះដែរ។
“ខ្ញុំសង្កេតឃើញអ្នកខ្លះគ្មានលុយទេ ប៉ុន្តែដោយសារតែចង់បង្អួតគេឯង និងឲ្យគេមើលខ្លួនថាឡូយសង្ហារ ក៏ខំរកលុយទិញទូរសព្ទដ៏ទំនើប iPhone ប្រើដូចគេអ្នកមាន”។
និយាយពីគុណវិបត្តិវិញ យុវជនរូបនេះបញ្ជាក់ថា មិនជាបញ្ហាធំដុំអីនោះទេ ប៉ុន្តែប្រហែលជាត្រូវបង់លុយខាតអស់ច្រើន នៅពេលចង់លក់ចេញទៅវិញ។
ចំណែក រតនា ដែលជាពលរដ្ឋរស់នៅម្តុំជ្រោយចង្វាប្រាប់ថា ដោយសារតែភាពទំនើបនិងការនិយមតៗគ្នាទើបធ្វើឲ្យមនុស្សមួយចំនួន ទោរទន់រកគ្នាទិញប្រើ iPhone បើទោះបីដឹងថាតម្លៃថ្លៃយ៉ាងណាក៏ដោយ។
យុវជនរូបនេះបន្តថា អ្នកដែលកាន់ប្រើ iPhone ហាក់មានមោទនភាពចំពោះខ្លួនឯង ហើយគិតថាខ្លួនឯងពិសេសជាងគេដទៃ ទើបធ្វើឲ្យពួកគេមួយចំនួនសម្រេចចិត្តដោយគ្មានការស្តាយស្រណោះនោះទេ។
ថ្មីៗនេះ Apple ទើបតែបញ្ចេញលក់ iPhone ជំនាន់ថ្មីគឺ iPhone 5S និង 5C និងត្រូវគេនាំចូលមកលក់លើទីផ្សារប្រទេសកម្ពុជា។ ត្រឹមតែរយៈពេល ៣ ថ្ងៃក្នុងការចេញលក់ដំបូង iPhone ជំនាន់ថ្មីទាំងពីរស៊េរីនេះ លក់ដាច់ជាង ៩ លានគ្រឿង ខណៈដែលនៅកម្ពុជាក៏ឃើញមានការទិញប្រើជាហូរហែដែរ ប៉ុន្តែមិនមានតួលេខជាក់លាក់នោះទេ។
ចុះមិត្ត យុវវ័យគិតថា អ្នកប្រើ iPhone ជាមនុស្សបែបណាដែរ?
បន្តអានអត្ថបទ៖ “ថ្លៃដើមផលិត iPhone 5S “
បន្តអានអត្ថបទ៖ “មើលទីផ្សារហាងឆេងទូរសព្ទថ្មីៗ
អត្ថបទ៖ ប៊ុណ្ណារ៉ា
0 comments:
Post a Comment