ពូឃ្លាំង ការងារសប្បុសធម៌ធ្វើឲ្យលោកទទួលឋានៈជាទូតសុឆន្ទៈ
តារាចំរៀង ហ៊ីបហប បែបខ្មែរ ពូឃ្លាំង បានទទួលឋានៈជាទូតសុឆន្ទៈ សម្រាប់អង្គការ ស្នាមញញឹមនៃកុមារ និងត្រូវរកប្រាក់ ៣០ម៉ឺនដុល្លារសម្រាប់កុមារក្រីក្រនៅកម្ពុជា។
លោកក៏បានសម្រេចបំណងដ៏ធំមួយ ដែលចង់ក្លាយជាមនុស្សសំខាន់ម្នាក់ ហើយក៏ទទួល ឋានៈទូតសុឆន្ទៈ កាលពីព្រឹកថ្ងៃទី២១ខែកញ្ញាឆ្នាំ២០១៣ នៅមណ្ឌលរបស់អង្គការ PSE ក្នុងភូមិព្រែកទប់អតីតកន្លែង ចាក់សំរាមស្ទឹងមានជ័យ។
តាមការដកស្រង់ពី ស៊ីអីអិន បានឲ្យដឹងថា អ្នកសិល្បៈ ដែលស្រលាញ់ការងារមនុស្សធម៌ ពូឃ្លាំង បានរៀបរាប់ពីមូលហេតុដែល អង្គការ PSE រើសយករូបលោកថា “សម្រាប់ខ្ញុំមុននឹងគេជ្រើសរើសយក ប្រហែលជាគេ ឃើញចំណុចមួយចំនួនដែលពាក់ព័ន្ធនឹងការងារនោះ ។ ចំពោះតួនាទីខ្ញុំ ត្រូវចេះស្រឡាញ់ពួកគេឲ្យបានច្រើន នឹងឲ្យពួកគេក្លាយជាមនុស្សល្អ ។ និយាយឲ្យស្រួលស្តាប់ ដូចខ្ញុំមានកូន ហើយក្នុងការចិញ្ចឹមកូនម្នាក់តើវាពិបាកប៉ុន្មាន ទម្រាំតែកើតមកពេញរូបរាង មានការហូបចុកគ្រប់គ្រាន់ មានការចេះយល់ដឹងដែលកុមារទូទៅត្រូវតែដឹង យើងឃើញ មានការខុសគ្នារវាងកុមារនៅទីនេះច្រើនៗទាល់តែមែនទែន” ។
គេហទំព័រដដែលបានបន្តថា ជាមួយនឹង ភាពសប្បាយរីករាយដែលផ្តល់ទៅកុមារក្រីក្រទាំងនោះលោកបន្តថា “ខ្ញុំចាប់អារម្មណ៍មួយថា កុមារអ្នកក្រអីមើលវាលាបសក់ពណ៌ក្រហម ប៉ុន្តែបើគិតឲ្យមែនទែនទៅកុមារនោះ គ្នាខ្វះជីវជាតិដែលញ៉ាំមិនគ្រប់ទើបសក់គ្នាឡើងក្រហម ។ ចំណុចទាំងនេះខ្ញុំ គិតថា ខ្ញុំនឹងអាចជួយដល់ការងារសម្រាប់កុមារជាមួយនឹងPSEបាន ជាពិសេសអាចនាំឲ្យ មនុស្សយល់ថា ការងារនេះជាអ្វី ហើយអ្នកមានចិត្តធម៌មួយចំនួនមិនបានជួយ”។
ពូឃ្លាំង បានបន្ថែមថា ចំពោះកម្រៃ គឺមិនបានយកពីអង្គការនេះទេ ហើយគម្រោងវគ្គ នេះដែលត្រូវធ្វើមានចំនួន៣០ម៉ឺនដុល្លារ ។ ត្រូវរកលុយឲ្យបានសម្រាប់បំពេញតម្រូវការ និងតួនាទីដែលអង្គការនេះផ្តល់ឲ្យ ហើយយើងត្រូវសន្សំៗរហូតទាល់តែគ្រប់ចំនួន ពីការ ងារជាច្រើនដែលជាគោលការណ៍របស់អង្គការPSE ។ គោលការណ៍ត្រូវនាំក្រុមសិល្បៈ របស់លោក ដែលធ្វើយ៉ាងណាឲ្យគេយល់ដើម្បីចូលរួមសម្តែងអត់គិតកម្រៃ ដើម្បីឲ្យ គ្រប់តាមការគ្រោងទុក ហើយការងារនេះមិនបានកំណត់ពេលវេលានោះទេ ។ នៅដើមឆ្នាំ ២០១៤ នឹងចាប់ផ្តើម ប្រគុំតន្ត្រីតាមខេត្ត-ក្រុង និងនៅខែវិច្ឆិកា គឺមានខនសឺតនៅសៀមរាប ដែលមានការភ្លក់ម្ហូប បែបខ្មែរ ដូចបានធ្វើនាពេលកន្លងមកនៅស្តាតអូរឡាំពិកអីចឹងដែរ ។
ជាចុងក្រោយឌីជេឃ្លាំង ដែលសម្បូរទេពកោសល្យបានផ្ញើរសារទៅកាន់អ្នកសិល្បៈ ទូទាំងកម្ពុជាថា យើងជាអ្នកសិល្បៈ ជាអ្នកឈានមុខ គិតមុន សូមធ្វើអ្វីដែលចំណេញ សម្រាប់ខ្លួនឯង បើមិនបានចំណេញដល់ខ្លួនឯង ក៏គួរតែអាណិតដល់អ្នកសិល្បៈដទៃ កុំឲ្យត្រីមួយត្រកស្អុយមួយ គឺស្អុយទាំង អស់នោះទេ ។ បើអាចគួរតែយកពេលវេលាផ្តល់ លុយដល់ក្មេងៗសុំទានតូចៗចាប់ពីថ្ងៃនេះតទៅ ដែលមកសុំយើង ដោយពីមុនគិតថា ម៉ែឱ ពួកគេគឺជាអ្នករៀបចំឲ្យដើរសុំទាន ធ្វើមុខកម្សត់ដើម្បីបានលុយ ។ ប៉ុន្តែយើងគិតឡើងវិញ បើយើងឲ្យលុយទៅក្មេងនោះ ទោះយ៉ាងណាក៏ក្មេងនោះបានលុយយកទៅទិញអីហូប ឆ្ងាញ់ដែរ តែបើអត់បានលុយម៉ែឱវាអាចនឹងវាយដំក៏មានដែរ ។ អីចឹងយើងគួរតែរៀនឲ្យ លុយទៅ ព្រោះគ្មានអ្នកណាចង់ក្លាយជាអ្នកសុំទានមួយជីវិតនោះទេ ។
ចំពោះលោកពិន សារពេជ្រ ជាប្រធានអង្គការPSEបានអះអាងថា ការដែលយើង រើសយកពូឃ្លាំង ហើយសិល្បៈដទៃទៀតមិនយក គឺមិនមែនយើងជ្រើសរើសនោះទេ លោកចង់បានអ្នកផ្សេងទៀតឲ្យមកចូលរួមដូចគ្នាដែរ ។ បើសិនជាមានអ្នកផ្សេងទៀត ចង់ចូលរួមដើម្បីធ្វើយ៉ាងណាឲ្យការអប់រំរបស់យើងមានការកើនឡើង គឺយើងក៏ទទួល ពួកគាត់យ៉ាងរាក់ទាក់ដូច្នេះដែរ ។ មកទល់ពេលនេះពូឃ្លាំងជាទូតទីមួយរបស់យើង ដែលគាត់ធ្វើការជាមួយPSE យូរមកហើយ តទៅមុខទៀតអាចមានតារាផ្សេងទៀតចង់មក ចូលរួម គឺយើងទទួលទាំងអស់ ។
សូមបញ្ជាក់ថា ពូឃ្លាំង ដែលជាឌីជេ និងជាសិល្បករដ៏ល្បីនៅកម្ពុជា បានធ្វើការចុះហត្ថលេខាជាមួយអង្គការដើម្បីភាពញញឹមនៃកុមារ ដើម្បីធ្វើជាអគ្គរាជទូតសុឆន្ទៈនៃអង្គការ និងធ្វើការផ្សព្វផ្សាយអំពី “ការអប់រំសម្រាប់មនុស្សទូទៅ” នៅក្នុងប្រទេសកម្ពុជា៕
--------------
អត្ថបទយោង៖ គេហទំព័រ ស៊ីអីអិន (CEN)
ប្រភពពី៖ www.neavea.com
0 comments:
Post a Comment